詩：黃粱 朗讀：黃粱 語言：台灣語
1947年3月8日下午，整編21師師長劉雨卿，率領師部和146旅部隊由吳淞口出海抵達基隆港，隨即與駐港軍警聯手展開掃蕩。沿街一戶一戶敲門，看到年輕男子即抓上車，總察總局關了兩百多人，陸軍兵營也人滿為患。不少無辜民眾被連夜載到海濱，以鐵絲貫穿手盤脛骨，9人連成一排推向大海，槍殺後任其隨浪漂海。大部分死者僅以麻袋裝填丟入海中，基隆近海漂滿屍體蔚為奇觀。社寮島死傷慘重，事件後為掩飾屠殺真相改名和平島。從8日到16日基隆二二八事件受難人數超過2000人。
林木杞是不識字的瑞芳礦工，戰後在基隆警察分局當工友也無故被抓走。他是被貫過鐵絲在海中漂流的倖存者，因提早被旁邊倒下的死者拖入大海沒被子彈打中。林木杞因身體傷殘以貧戶終其一生，四十年來不敢提起此事，連家中老婆都不敢告知，可見殺戮的恐怖陰影影響台灣人心多麼深遠，台灣人的歷史從此暗啞變成失語狀態。台灣的啞口戲究竟還要搬演多少年才會終止？沒有追究歷史真相與釐清責任歸屬如何化解悲情？
＜武裝部隊登陸雨港＞
三月初八下晡中國運兵船開入雞籠港
忽然間乒乒砰砰街頭巷尾攏是兵
機關銃放出一群囂狗亂吠亂皂
血跡自港墘開始詼諧走唱
港都暗暝个哀吼有啥人聽見？
海水即爾鹹目屎赫爾闊
初九透早眠夢中
一大堆兵仔來挵門挵甲乒乓叫
阮厝高砂町一丁目一番地是第一間
兵仔手提簿仔
頂面寫我是「流氓」
臺灣攏講「鱸鰻」毋知「流氓」啥罪名
部隊佇港埠街仔逐間挵門
規條街个少年家一陣一陣予人掠走
仁愛國校佮信義國校隔一條圳溝
遐已經有足濟人跪規排
兵仔用銃押牢牢
無細膩亂振動開銃踢落去水溝
兵仔車滿街踅看著人就掠走
共臺灣同胞一概當作仇敵
這臺車頂攏總二三十个無辜民眾
直接駛對警察總局个枷牢
幾歲？叫啥物名？萬項無問咱
我揣空縫叫人用錢去通
基隆名醫郭守義嘛關佇遮
「郭醫師愛用錢啦用錢通看覓」
「我甘願死嘛莫予這班土匪錢」
厝內借五萬買一條活命
有情義个人顛倒赴死
三个大牢總共窒兩百外人
十个人大約死九點九
彼擺險死焦燥个嚨喉擠滿柴枝
港都夜雨直直落
天个目屎幾十年來流袂離
四箍輾轉澹糊糊
心內滫甲無一塊焦塗
陸軍兵仔營个樹林傳出哀聲悽慘濟罣
天烏了後共草民搡上運送車
載到元町派出所後壁海灣
百外名阿兵哥開始創造人肉排骨
雙手雙跤鐵線反縛穿做伙
縛做九排每排九人
鐵線從手盤迵過
雙跤个脛骨用鑽仔戮空
海湧亂搖配樂愈來愈激烈……
有人用「刣人滾耍笑」來安邦定國
「密裁」可比荒誕派戲劇
搭舞臺个人堅持奉令行事
導演嘛講劇本毋是伊个意思
轉來轉去大海才是萬惡深淵
阮被掛佇一排九人落尾一个
兵仔用布束縛阮个目箍
耳孔忽然間霆雷公
先著銃个人順勢共阮拖落海
兵仔袂赴掜板機
銃尾刀劃破跤後肚
捌有人從海岸看見這幕奇景
規摜浮佇海面若像炰煙腸
喙焦偓促个啉過人血个
比世情擱較惡毒个鐵線
毒蛇逍遙自在
佇海个祭典當中若浮若沉
淺水碼頭牛稠港仙洞
三沙灣濱町社寮島
一寡用麻袋仔橐一寡用鐵線捆
身軀予魚咬甲反色爛糊糊
浮屍累累共藍別莊裝潢甲真有氣勢
臺灣藝術提早進入後現代
基隆雨基隆雨！
港口船肚市場墓仔埔
攏總淋予澹漉漉
基隆雨基隆雨！
學生漁民炭工生理人
士農工商掃予反倒
八具沉重个屍體助阮扭斷鐵線
暗眠摸泅向礁石
等無人聲了後一隻野狗爬上岸
荒埔掘番薯糊草藥
南榮公墓藏十外工沓沓仔回魂
我無讀過冊以早佇瑞芳挖塗炭
戰後無米通食
朋友佇分局做警察我去找伊參詳
「我來掃地你分一口飯予阮吃好無？」
透早踮分局掃塗跤無因致端予人掠走
嚇破膽个老阿伯禁聲四十年
驚予人掠去擱再填海
「結婚赫爾濟年連阮太太嘛毋知」
林木杞跤手痠軟袂做粗工煞墮落貧戶
日光普照白死殺个面
驚惶个面具密密掜咧伊个面框
政府用心調教个啞口戲人才
這款表情搬演一个時代个歷史
主要資料來源：
《基隆雨港二二八》（吳三連臺灣史料基金會，2011）
〈郭鐘美〉（訪問者：張炎憲、黎中光、高淑媛／受訪者：郭鐘美）
〈楊國仁〉（訪問者：張炎憲、胡慧玲、高淑媛／受訪者：周金波夫婦）
〈基隆市仁愛區老人會 張梓隆〉（訪問者：張炎憲、胡慧玲／受訪者：張梓隆）
〈基隆市仁愛區老人會 林木杞〉（訪問者：張炎憲、胡慧玲／受訪者：林木杞）
黃粱歌詩《小敘述 二二八个銃籽》
唐山出版社，2013年出版
目錄
題詞
獻詩
序曲
一、罪个盤旋
二、嘉義驛前
三、臺灣光復講演紀錄
四、彼工落山風吹甲真大
五、一枝焦柴引起大火
六、本報電臺收南京長春三月六日電
七、武裝部隊登陸雨港
八、死亡證據
九、桃花扇觀後
十、黨令如山雪紅似血
十一、鳳林張七郎
十二、《臺灣名人寶鑑》
十三、語言的裂隙
十四、空留一劍匣中寒
振魂曲
為臺灣祈禱
後記
附錄
沒有留言:
張貼留言